सम्मानको श्रृंखला
 |
| डा.सञ्जिव शर्मा प्रमुख, इन्टर्नल मेडिसिन विभाग, बीपी कोइराला स्वास्थ्य विज्ञान प्रतिष्ठान, धरान |
कोभिड संक्रमित भएर उपचारका लागि आउनु भएका ती बिरामीलाई सम्झन्छु, जसलाई सम्हाल्न हाम्रो टिमलाई निकै गाह्रो भएको थियो । उहाँहरूमा मनोवैज्ञानिक समस्या रहेछ । परामर्श नै आवश्यक प¥यो । कोभिड उपचार गर्ने टिममा साइक्र्याटिक विभागका साथीहरू पनि हुनुहुन्थ्यो । धेरै दिनको परामर्शपछि मात्रै उहाँहरूले औषधि खान सुरु गर्नुभयो । औषधि सुरु गरेको तेस्रो दिन स्वाब लियौं । स्वाब लिन पनि गाह्रो भयो । स्वाब लिएपछि उहाँहरूलाई क्वारेन्टिनमा पठायौं ।
अब अर्को केसको कुरा गर्छु, भुल्केबाट एक जना गर्भवती आउनु भयो । उहाँमा कोरोना भाइरस संक्रमणको लक्षणहरू थियो । गर्भवती अवस्थामा देखिने केही जटिलताहरू पनि थिए । गर्भको शिशु झिक्न हामीले शल्यक्रिया गरयौं । केही दिन अघि अस्पतालमा एउटा यस्तो केस आयो, जुन बिरामीमा कोरोना लक्षण देखिइसकेको थिएन । तर, बिरामी शिथिल हुनुहुन्थ्यो । सावधानी अपनाउँदै उहाँलाई आइसोलेसनमा राख्यौं । परीक्षणले उहाँलाई डायलासिस गर्नुपर्ने देखायो । पीपीइ लगाएर उहाँको डायलासिस गरायौं । त्यतिखेर हाम्रो टिम त्रासमा थियो । उहाँ पनि एकदमै पीडामा हुनुहुन्थ्यो ।
कोरोनाका बिरामीको मानसिक अवस्था विश्लेषण गर्छु । वास्तवमा उहाँहरू मानसिक तनावमा हुनुहुन्छ । त्यो तनावले उहाँहरूलाई कमजोर बनाएको छ । रुघा, खोकी त्यो भन्दा केही जटिल लक्षण देखा परेपछि मलाई कोरोना भयो भन्ने शंकाले ल्याएको तनाव, दोस्रो, कोरोना पुष्टि भयो भने मलाई कसैले छुँदैन भन्ने चिन्ताले निम्ताएको तनाव र तेस्रो, परिवारसँग छुट्टिएर बस्नुपर्दाको एकांकीपनले उहाँहरूमा मानसिक समस्या देखा परेको छ । कोभिड उपचारमा खटिनु हुने चिकित्सक, नर्सले भाइरसको उपचार सँगसँगै उहाँहरूको मनोविज्ञानलाई समेत बुझेर काम गरिरहनु भएको छ ।
डाक्टर नर्सको पनि स्वाब परीक्षण
सञ्चारमाध्यममा आउने समाचार, आफन्त, साथीभाइसँग हुने कुराकानी पनि कोरोनाबाट मृत्यु हुने कै तथ्यांकमा केन्द्रित हुन्छ । फेरि यो रोग नै नयाँ प्रकृतिको भयो, औषधि पत्ता नलागेको अवस्था छ । त्यसैले पनि होला, मनमा कता कता डर लाग्ने रहेछ । इटालीको एउटा अस्पतालमा जहाँ मैले १० वर्षअघि काम गरेको थिएँ, त्यहाँ मृत्यु भएकाको संख्या सुन्दा पनि मन आत्तिदो रहेछ । आत्तिएको मनलाई सकारात्मक समाचार सुनेर, नराम्रोभित्र पनि राम्रो खोजेर सम्हाल्ने प्रयास गरेको छु । सम्पूर्ण साथीहरूलाई त्रसित होइन, सतर्क रहौं भन्न चाहन्छु ।सावधानी अपनाएर कोभिडको उपचारमा खटिने चिकित्सक, नर्सहरू एक साताको ड्युटीपछि अर्को एक साता क्वारेन्टिनमा बस्नु हुन्छ । पोजेटिभ बिरामीसँग पहिलोपटक भेट भएको मितिले पाँचौ दिनमा स्वाब परीक्षण गर्ने गरिएको छ । कोभिडको उपचारमा खटिएका चिकित्सक र नर्सहरू अस्पताल परिसरमै रहेका कटेजबाट अस्पताल आउँजाउँ गरिरहनु भएको छ । यो क्वारेन्टिन हो । म अहिले अस्पतालकै क्वाटरबाट अस्पताल आउँछु । संक्रमितको संख्या बढे कटेज क्वारेन्टिनमा बस्ने निधो गरेको छु ।
रयापिड रेस्पोन्स टिम
म संलग्न अस्पतालले मुख्य गरी तीन क्षेत्रमा काम गर्छ । अध्ययन–अध्यापन, बिरामीको सेवा र अनुसन्धान । नेपालमा कोरोना भाइरसको संक्रमण देखिएपछि अस्पतालको ध्यान बिरामीको सेवा र अध्ययन–अनुसन्धानमा केन्द्रित छ । कोभिडका बिरामीको उपचार गर्न रयापिड रेस्पोन्स टिम बनाएका छौं । यो टिम अन्तर्गत पनि अन्य टिमहरू बनेका छन् । जसले गर्दा काम गर्न सजिलो भएको छ । कोभिडका बिरामीको उपचार बनाइएको वार्डमा जान प्रवेशद्धार नै फरक छ । आइसोलेसनमा जानु पर्दा बिरामीले एम्बुलेन्स प्रयोग गर्नुपर्छ । बिरामीको स्वाब लिँदा अत्यन्तै सावधानी अपनाइन्छ । आइसोलेसन सेन्टरमा भेन्टिलेटरको सुविधा प्रयोग गर्न सकिने बेडहरू छन् । अहिले कोभिड अस्पताल पनि बनेको छ । अन्य रोगका बिरामी जो लामो समयदेखि यो अस्पतालमा उपचार गराइरहनु भएकाहरूका लागि डाक्टर इन्द्र लिम्बुको नेतृत्वमा काम गरिरहेका छौं । स्थानीय सरकार र सुरक्षा निकायको सहयोग लिएर एम्बुलेन्स प्रयोग गरी उहाँहरूको घरमै औषधि पु¥याउने व्यवस्था मिलाएका छौं । कहिले काहीं उहाँहरूको रगत, पिसाब परीक्षणको पनि व्यवस्था मिलाउनुपर्छ ।
No comments:
Post a Comment