अनुभव श्रृंखला
 |
नारायाण सुवेदी |
जतिबेला संसारभर कोरोना भाइरस तीब्र गतिमा फैलिरहेको थियो, त्यत्तिबेला विश्लेषकहरूले जापानमा पनि संक्रमण व्यापक हुने प्रक्षेपण गरेका थिए । कोरोना भाइरस (कोभिड–१९)ले विश्वका शक्तिशाली राष्ट्रहरूमा कर्मचारी कटौती, राहत वितरण, अभाव र असुरक्षा भइरहेको बेला एसियाली मुलुक जापानले यस्तो परिस्थितिको सामना गर्नुपरेको छैन । यो परिस्थिति सामना गर्न नपर्नुको कारण जिम्मेवार सरकार र सरकारलाई सम्मान गर्ने नागरिक हुन् ।
सरकारले जारी गरेको नियमलाई जनताले अनुशासित भएर पालना गरेकाले संक्रमण फैलन पाएन । जापान सरकारले लकडाउन गरेन । संकटकाल लगायो । नाइट क्लबहरू बन्द थिए । रेष्टुराँहरू आठ बजेसम्म खोल्न दिइएको थियो । जनतालाई सक्दो सहयोग गर्न सरकारले अनुरोध गर्दै बिदाको समयमा घर बाहिर ननिस्कन अनुरोध गरेको थियो । बलियो सरकार र जिम्मेवार नागरिक भएकाले पहिलो चरणमा कोरोना संक्रमण नियन्त्रणमा आएको थियो ।
टोकियोलगायतका ठाउँमा संक्रमण देखिएको खबर आएको छ । सरकारले फेरि पनि संक्रमणकाल लगाउने तयारी गरेको खबर पाएको छु । यो नियन्त्रण गर्न पनि जापान सरकार सफल हुन्छ भन्नेमा म निश्चिन्त छु ।
जापान सरकारले आफ्ना जनता र अन्य देशका नागरिकहरू जो कोरोना भाइरसको संक्रमणको महामारीबाट प्रभावित भएका छन्, उनीहरूलाई प्रतिव्यक्ति एक लाख जापानी येन सहयोग स्वरूप दिएको छ । त्यसैगरी जापान सरकारले सबैलाई दिए जस्तै विद्यार्थीलाई एक लाख येन त दियो नै । उनीहरूसँग बचत हुँदैन भन्दै थप दुई लाख रुपैयाँ पनि दिएको छ ।
यहाँका साना तथा मझौला उद्योगका व्यवसायीहरू जसको अघिल्लो सालको तुलनामा बिक्री घटेको थियो, व्यवसायको आकार र प्रकृति हेरेर त्यस्ता व्यवसायीलाई जापान सरकारले दश लाख येनदेखि बीस लाख येनसम्म राहत घोषणा गरेर वितरण गरेको छ । बराबरको टोकियो नगरपालिकाले एउटा रेष्टुँरालाई पाँच लाख येन अनुदान सहयोग दिएको थियो । ठूला लगानीका व्यवसायीलाई भने एक करोडदेखि चार करोड रुपैयाँसम्म तीन वर्षका लागि बिना व्याज ऋणको रूपमा दिएको छ । यसका साथै अन्य विभिन्न प्याकेजहरू ल्याएको छ ।
जापान सरकारले यो व्यवस्था गर्नुको मुख्य कारण के हो भने, व्यवसायीहरू व्यवसायबाट पलायन नहोऊन्, रोजगारविहीन भएर कोही पनि बस्न नपरोस् भन्ने हो । बलियो र जिम्मेवार सरकार भए नागरिकले कुन हदसम्मको सुरक्षाको अनुभूति पाउँदा रहेछन् भन्ने कुरा जापानलगायत अन्य विकसित देशलाई हेर्दा पुग्छ । जापान सरकारले नागरिकदेखि व्यवसायीसम्मलाई आफ्ना कार्यक्रमले सम्बोधन गरेको छ ।
यहाँ बसेर आफ्नो मातृभूमिलाई सम्झँदा हृदय पोल्छ । सरकारको दरिद्रपन देखेर शीर निहुरिन्छ । टाढा बसेर हेर्ने हामीले मात्रै भनेको होइन नेपालमै भएका नेपालीहरू समेत सरकारको गतिविधिबाट सन्तुष्ट छैनन् । भ्रष्टाचार, खिचातानी यस्तै यस्तै ।
नेपाल फर्कान नेपाल सरकारले लिएको हवाइजहाज चार्टरको शुल्क हेर्दा नागरिकलाई सहयोग गरिरहेको छैन, व्यापार गरिरहेको छ जस्तो लाग्छ । यहाँबाट अहिलेसम्म दुईवटा चार्टर फ्लाइट उडेका छन् । ती दुईबाट साँढे चार सय नेपाली फर्किनु भएको छ ।
जापानबाट नेपाल फर्कन चाहने नेपालीहरू धेरै हुनुहुन्छ । छोराछोरी भेट्न आउने धेरै हुनुहुन्छ । पालो पर्खेर बसेका साथीहरू अझै केही हुनुहुन्छ । खाडी र मलेसियाको तुलनामा जापानमा रोगजारी गुमाउनेहरू कम हुनुहुन्छ । रोजगारी गुमाउने कम भएका र राज्यले नै व्यवस्था गरेकाले राहत भनेर कसैलाई बाँड्नु परेको छैन । विद्यार्थी वा अन्य कसैलाई खान बस्नका लागि समस्या भए सहयोग गर्नका लागि जनसम्पर्क समितिको बैठक बसेर कोष स्थापना गरेका थियौं ।
हरेक क्षेत्रमा काम गर्नका लागि पाँचदेखि सातजनाको समिति समेत बनाएका थियौं । अहिलेसम्म त्यो समितिमा ‘हामीलाई सहयोग चाहियो’ भन्दै कसैले पनि सहयोग माग्नु भएको छैन । अन्य मुलुकमा जस्तो मुलुकमा जस्तो खाना र बस्नकै लागि समस्या भएर राहत नै बाँड्नु पर्ने अवस्था छैन ।
जापानसम्मको यात्रा
चितवन जिल्ला भरतपुरका नारायण सुवेदी अवसर खोज्ने क्रममा १६ वर्ष अघि जापान आए । सुरुदेखि नै आफ्नै व्यवसाय गर्ने चाहना थियो उनको, जापान पुगेको केही समयपछि व्यवसाय सुरु गरे । नेपालबाट स्नातकोत्तरको पढाई सकेर जापान पुगेका उनी नेपाली कांग्रेसको महाधिवेशन प्रतिनिधि हुन् । महासमिति सदस्य समेत रहेका नेपाली जनसम्पर्क समिति जापानका पूर्व सभापति उनी सल्लाहकारको भूमिकामा छन् ।
helping desk 6 vanera tha na pa ra ho ki
ReplyDelete